ROXAS CITY – Ginabaha ang 32 ka barangay sa 7 ka banwa sa probinsiya sang Capiz bangud sa padayun nga pag-ulan tuga sang bagyo nga Basyang.
Kalakip sa mga ginbaha nga lugar ang anum ka barangay sa banwa sang Cuartero, 2 sa Dumalag, tatlo sa Maayon, 5 sa Mambusao, 9 sa Panit-an, 3 sa Panay kag 4 sa Dao.
Sa interview sang Bombo Radyo Roxas kay Mr. Espiridion ”Speed” Pelaez, action officer sang Provincial Disaster Risk Reduction and Management Office (PDRRMO) Aksyon Tabang, ginpahayag sini nga padayun ang pagtaas sang lebel sang tubig sa mga suba bangud sa wala untat nga pagbubo sang ulan humalin pa kahapon.
Samtang suno naman kay Mr. Rommel Lastimoso sang City Disaster Risk Reduction and Management Office nga may nabaton sila nga report nga nahulog ang billboard sang isa ka car company sa Barangay Bolo, Roxas City, bangud sa mabaskog nga hangin.
Kanselado man ang biyahe sang tanan nga barko kag sakayan pangisda mangin sa Roxas City airport, sa diin wala nakahugpa ang eroplano sang Cebu Pacific bangud sa mabaskog nga ulan kag hangin
