ROXAS CITY – Nagpabalhag sa pulisya ang isa ka 34-anyos nga ginang matapos nga ginaalegar ginsulod sang grupo sang mga kalalakinhan ang ila balay sa Barangay San Jose, Roxas City.
Ginkilala ang tagreklamo nga si Vina Calinao sang nasambit nga lugar.
Base sa inisyal nga imbestigasyon sang Roxas City PNP nga samtang nagakaon ini sang pamahaw sa ila balay, hinali na lamang nga may nag-abot nga duha ka mga salakyan nga nagaduag sang darkgray kag darkgreen sa diin may yara sang tatlo ka mga kalalakinhan nga armado sang armas luthang kag nagasuksok sang bonnet mask kag ginapangita ang bana sini nga si Raymund John Genoves antes nagsulod sa ila balay.
Apang, gintuad sini sa mga suspek nga wala ang iya bana bangud nagatrabaho sa bahin sang Metro Manila.
Nahibaluan nga ginlibot sang mga suspek ang ila balay kag ginapangita ang iya bana.
Magluwas diri, ginpabukad sang mga suspek ang iya wallet kag sang iya mga bata.
Samtang, may yara naman sang isa ka babaye sa guwa nga ginaalegar kaupod man sang mga suspek ang nagabantay sa guwa sang ila balay.
Bangud sa natabo ginpakamaayo na lamang sang tagreklamo nga ipa-rekord sa pulisya ang insidente.
