ROXAS CITY – Patay ang 34-anyos nga lalaki matapos nga makuryente sa Brgy. Lanot, syudad sang Roxas alas 11:00 sang gab-i, Abril 12.
Ang indi na paghingadlan nga biktima ang residente sang amo nga lugar.Ginapahayag nga nagikan sa evacuation center ang biktima kag nagpauli sa ila puluy-an, apang nakit-an na lang ini sang mga himata nga nagahigda na kag may paso sa dughan kag kamot.
Ginapatihan nga nakuryente ini bangud nasulod sang tubig-baha ang balay kag nakit-an man ang pila ka mga extension nga nakasaksak.
Ginpadangat pa sa pribado nga ospital ang biktima apang gindeklarar nga dead on arrival sang doktor.
Samtang, ginpahayag ni Punong Brgy. Totong Tuazon, nga magahatag sang bulig ang barangay sa pamilya sang biktima para sa pagpalubong.
Sa karon, yara na punerarya sa Brgy. Lawaan ang bangkay sang biktima.
