ROXAS CITY – Patay ang 34-anyos nga persona matapos nga ginaalegar ginluthang sang wala matumod nga persona sa Barangay Tina, Dumarao, Capiz.
Ginkilala ang biktima nga si Noel Sarceno sang nasambit nga lugar.
Sandig sa inisyal nga imbestigasyon ni Police Staff Sergeant Jomar Bernabe sang Dumarao Municipal Police Station nga yara sa idalom sang impluwensya sang makahulubog nga ilimnon ang biktima sang nagpadulong ini sa bilasyunan sang iya pakaduha kun sa diin gintayaan kag luthangon sini kuntani ang duha ka mga persona nga sanday Nestor Venecio kag Razel Acejo.
Nahibaluan nga ikaduha ka beses pa sini ginpitik ang gatilyo sang armas luthang apang wala man ini naglupok.
Gilayon naman nga nagdalagan kag naghalin ang biktima sa lugar sang hinali na lamang ini nga ginluthang sang wala matumod nga persona.
Bangud diri, nag-angkon sang pila ka mga igo sang armas luthang ang pila ka mga parte sang lawas sang biktima nga gilayon naman gindala sa Sara District Hospital, Sara Iloilo apang gindeklarar ini nga dead on arrival sang attending physician nga si Dr. Analysa Zeller.
Sa karon, nagapadayon ang ginapatigayon nga imbestigasyon sang mga kapulisan agud matumod ang suspek nga responsable sa pagpatay sa biktima.
Narekober naman sa lugar ang isa ka homemade 12 gauge shotgun (break type) kag isa ka bala, 5 ka catridges sang ginapatihan nga caliber .45 kag duha ka deformed slug sang wala matumod nga caliber sang armas luthang.
