ROXAS CITY – Makatalandog balatyagon ang mga ginpangbuy-an nga pahayag ni alyas ‘James’ natuhoy sa pamangkot sang kadam-an, kun may yara bala ini sang sikreto ukon ‘anting-anting’ sa mga babayi.
Sa interview sang Bombo Radyo kay ‘James’ ginpahayag sini nga wala ini sang sikreto ukon bisan ano nga ginhimo agud magpabilin ang babayi sa iya.
Magluwas suno diri nga gina-idolo sini ang aktor nga si Coco Martin, normal gid lamang nga manugtahi ini sang sapatos.
Matandaan nga liwat nabutang sa kontrobersiya si ‘James’ matapos nga sang Sabado sang hapon, Oktubre 23, sang nagwaras kag ginpangwas-ag sang iya kahagugma nga si ‘Jean’ ang mga display sini nga sapatos sa iya puwesto, bangud wala ini nagsugot sa hinyo sang iya nobya nga magpadulong sa hotel agud mag ‘hampang.’
Suno kay ‘James’ wala na ini masyado huyog sa ‘paghampang’ kag luyag sini nga isa ka beses lang sa isa ka semana ang amu nga buluhaton, apang luyag sang iya kahagugma nga kada duha ka adlaw ang ila schedule sa pagpadulong sa hotel.
Apang bangud wala ini sang dako nga kita sa pagpanahi, wala sini mahatag ang luyag sang iya kahagugma.
Nagapati si ‘James’ nga ang mga babayi, ang ginapalangga kag wala ginasakit, kag posible suno diri, amu ini ang rason nga kaangay ‘ginalagas’ siya sang mga kababainhan.
Matandaan nga sang damlag lang, ang anay live-in partner sang sapatero nga si alyas ‘Rose’ ang masami ginahalitan ang iya kaugalingon sa tion nga may indi pag-intindihanay sa ila agud magpabilin si ‘James’ sa iya.
Sa karon, ginahulat nalang sini nga magkalma ang paminsaron ni ‘Jean’ matapos ginkustodiya sa Roxas City PNP, ini bangud nagapati si ‘James’ nga kun akig ang babayi, pagka-aga nagakadula gid lamang ini.
