ROXAS CITY – Kapin sa 34 tanan ka mga igo sang bala ang nakita sa lawas ni Barangay Kagawad Onel “Dodoy” Arandez matapos nga ginluthang patay sang wala pa makilala nga mga suspek sa isa ka talyer sa Barangay Cagay, Roxas City.
Suno kay Police Colonel Joe Martin Fuentes, nakita sa resulta sa ginpatigayon nga autopsy examination sa bangkay sang nasambit nga opisyal ang anum ka igo sa ulo, pito sa iya nga lawas, duha sa nawala nga butkon kag duha sa nawala sini nga tiil sa diin 16 ka bala ang naglapos.
Ginpahayag ni Fuentes nga wala naman sang slugs nga rekober sa lawas sang biktima.
Samtang naghinyo ang pamilya ni Arandez nga indi na pag-ipalayag sa kahanginan ang kabugusan nga resulta sang ginpatigayon nga autopsy examination.
Matandaan sa ginpatigayon nga imbestigasyon sang mga kapulisan narekober ang 25 ka mga basiyo sang armas luthang kag anum ka mga slugs sa ginluntaran sang insidente.
Samtang, ginahulat na lamang sang Roxas City PNP ang beripikasyon sang pamunuan sang Land Transportation Office (LTO) agud matumod kun kay sin-o nakarehistro ang salakyan nga gingamit sang mga suspetsado.
