PANITAN, CAPIZ- Nagapabilin sa isa ka pribado nga ospital sa syudad sang Roxas ang isa ka 35 anyos nga persona matapos nga ginbungguan sang isa ka ten wheeler truck ang iya ginamaneho nga motorsiklo sa Barangay Timpas, Panitan, Capiz.
Ginkilala ang biktima kay Roger Celuso, 35 anyos kag residente sang nasambit nga lugar.
Base sa inisyal nga imbestigasyon nga samtang ginasubay sang biktima ang dalanon sang hinali na lamang nag-overtake ang ten wheeler truck nga ginamaneho ni Rosbert Develles, 33 anyos sang Barangay Sablongon, Passi, Iloilo.
Apang sang pag-overtake sini, naalang-alangan ini rason nga nabungguan sini ang motorsiklo nga ginamaneho ni Celuso.
Bangud diri nag-angkon sang mga kasamaran sa magkatuhay nga parte sang lawas ang biktima kag gilayon nga gindala sa ospital agud dapatan sang nagakaigo nga pagbulong.
