ROXAS CITY – Magapatigayon na sang limited face-to-face graduation ang 35 ka mga bulutho-an sa idalom sang DepEd Capiz Division sa Hunyo 27 tubtob Hulyo 1 sini nga tuig.
Ini ang ginkumpirmar ni DepEd Capiz Division Superintendent Dr. Miguel Mac Aposin sang napakig-angutan sang Bombo Radyo.
Suno diri, sa pinal nga listahan sang SDO Capiz, sa 55 nga kabug-usan sang mga secondary schools sa probinsya, 31 diri ang magahiwat sang limited face-to-face graduation samtang 24 naman ang pinaagi sa virtual graduation, samtang sa kabug-usan nga 16 ka mga bulutho-an gikan sa Central Elementary Schools, apat diri ang magahiwat sang f2f graduation samtang 12 naman ang pinaagi sa virtual graduation sa pagtakup sang S.Y. 2021 – 2022, sa masunod nga semana.
Mahibaluan nga ang mga bulutho-an nga may f2f graduation ang nakapasar sa guidelines sang Inter-Agency Task Force (IATF) kag Department of Education (DepEd) Capiz, nakasumiter man ang mga ini sang nagakaigo nga requirements agud makapatigayon sang nasambit nga seremonya.
Dugang naman ni Dr. Roel Bermejo, Schools Division Superintendent of Roxas City sang napakig-angutan sang Bombo Radyo, 100% sa public schools sa Roxas City ang mapatigayon sang f2f graduation samtang pipila naman sa mga private schools.
Sa pihak nga bahin, padayon pa ang pagberipika sang Roxas City Division sa bug-os nga elementary schools nga magahiwat sang f2f graduation.
