ILOILO CITY – 36 ka mga anay drug dependents gikan sa Iloilo City Change Center ang naggradwar bilang kabahin sang Batch 12 sang Community-Based Drug Rehabilitation Program “CBDRP”, sa isa ka seremonya nga ginhiwat sang Huwebes, Mayo 28, 2026 sa USWAG Nutrition Center, General Luna Street.
Suno sa lokal nga gobyerno, ang programa nagatutok sa isa ka holistic kag community-based nga pamaagi sa rehabilitasyon agud mabuligan ang mga Persons Who Used Drugs “PWUDs”, nga makatukod liwat sang ila kabuhi kag makabalik sa katilingban bilang produktibo kag responsable nga mga pumuluyo.
Lakip sa opisyales sang Iloilo City Police Office “ICPO”, sa pagpanguna nanday Col Wilbert Parilla kag Deputy City Director for Operations Lt Col Lorenez Losaria bilang pagpakita sang suporta sa mga naggradwar.
Pahayag ni Col. Parilla, nga ang problema sa iligal nga droga indi masolbar paagi sa pagsilot lamang, kundi paagi sa pagbinuligay sang nagkalain-lain nga sektor lakip na ang gobyerno, komunidad, kag health agencies.
Dugang man sa impormasyon sang ICPO ang padayon nga suporta para sa mga programa nga nagatutok sa rehabilitasyon, pagpabaskog sang komunidad, kag mas inklusibo nga pag-uswag.
Nahibaluan nga ang kadalag-an sang programa isa ka pamatuod sang ginpabaskog nga koordinasyon sang lokal nga gobyerno, law enforcement, healthcare providers, kag iban pa nga national agencies sa pagbulig sa mga indibidwal nga yara sa pagpanglakaton padulong sa bag-o nga pagsugod.
