ROXAS CITY – Duguon nga nagakayaon kag wala na sang kabuhi sang nasapwan sa higad sang karsada ang isa ka lalaki sa Sitio Cabadiangan, Barangay Dinginan, Roxas City, alas 8:00 kagab-i, Pebrero 20, 2025.
Ginkilala ang biktima kay Jay Campos, 37-anyos samtang ang suspek amu si JR Anopre, yara sa legal nga pang-edaron, mga lunsay mangunguma kag lunsay man mga residente sang nasambit nga lugar.
Sa imbestigasyon sang Roxas Component City Police Station, nahibaluan nga antes ang insidente, magkaupod nga nag-inom-inom ang biktima sa balay ni alyas “Jun”, upod si alyas “Rich” kag alyas “Mar”. Nagguwa ang biktima kag suspek alas 8:00 sang gab-i para magpauli apang may nagluntad nga pagbinaisay sa tunga sang duha.
Samtang, nagguwa man si alyas “Mar” kag nagsunod sa duha kun sa diin gintinguhaan pa sini nga magtambag sa duha apang ginpahog ini sang suspek kag ginpaandaman nga indi mag-intra.
Nasaksihan ni alyas “Mar” ang pagpanglabo kag pagpangbuno sang suspek sang biktima kag ginpakamaayo nalang sini nga i-report sa barangay opisyal.
Gilayon nga gindala sa ospital ang biktima apang gindedklarar nga dead on arrival sang doktor nga nag-atendir.
Ginapatihan nga ginlabo kag ginbuno ang biktima bangud sa nakit-an nga patal nga pilas sa ulo kag tatlo ka buno sa dughan sini.
Samtang, ginpadulungan sang katapo sang Roxas City PNP kaupod ang miyembro sang BPAT ang balay sang suspek apang wala na ini kag nakapalagyo.
Sa karon, nagapadayon imbestigasyon kag ang hot pursuit sang kapulisan agud madakpan ang suspek.
