ROXAS CITY – Patay ang isa ka lalaki, matapos ginapahayag nga nalumos kaina takna alas 4:00 sang hapon sa Barangay Binaobawan, Pilar, Capiz.
Ginkilala ang napatay kay Jomar Ocayo kag residente sang San Blas, Pilar, Capiz.
Sa impormasyon nga nakuha sang Bombo Radyo sa Pilar Municipal Police Station samtang ang biktima kaupod ang pamilya kag abyan sini nagasakay sa balsa nga human sa kawayan, naglumpat ini kag wala na nakabutwa.
Bangud sini, gilayon nga nagpangayo sang bulig ang pamilya sang biktima sa otoridad agud magpatigayon sang search and rescue operation.
Apang, matapos ang ginpatigayon nga search and rescue operation sang katapo sang Pilar PNP, MDRRMC, PCG, Municipal Bantay Dagat kag Provincial Bantay Dagat nasapwan na lamang ang lawas ni Ocayo nga wala na sang kabuhi kag ginpahayag nalumos.
Sa karun yara na ang bangkay sang biktima sa isa ka punerarya sa amu nga banwa.
