ROXAS CITY -Nabaton na sang 379 ka mga benepisyaryo sang Tulong Panghanapbuhay sa mga Disadvantaged/Displaced Workers (TUPAD) ang bulig pinansyal sang Department of Labor and Employment (DOLE) sa probinsiya sang Capiz.
Ini ang ginkompimar ni Mr. John Leo Marco Beldia, PESO Manager sang Provincial Employment and Services Office (PESO) sang mainterview sang Bombo Radyo.
Ginpahayag ni Beldia ang mga nakabaton sang P3,950 nga TUPAD ayuda amo ang mga myembro sang transport sector kag mga myembro sang LGBTQ community nga wala nakabaton sang iban nga ayuda sang gobyerno kag nadulaan sang trabaho bangud sa covid-19 disease.
Suno kay Beldia nga gintrabahuan sang mga benepisyaryo sang napulo ka adlaw antes nakuha ang nasambit nga ayuda.
Gindugang pa ni Beldia nga madamo ang nag-apply nga mga benepisyaryo sa TUPAD apang ginpili sang ahensya ang mga kubos nga myembro sang nasambit nga sektor.
Suno pa kay Beldia nga mismo si Capiz Governor Esteban Evan Contreras II ang naghinyo sa DOLE nga mahatagan sang bulig pinansyal ang mga sektor nga wala nakabaton sang iban nga ayuda gikan sa gobyerno.
Samtang nagpasalig naman si Beldia nga ginatinguhaan sang provincial government nga mahatagan ang kubos nga wala pa makabaton sang mga ayuda sang gobyerno.
Mahibaluan nga sandig sa datos sang DOLE, may yara sang kabug-osan nga 2,362 ka mga benepisyaryo sang TUPAD program sang nasambit nga ahensya sa probinsya sang Capiz
