ROXAS CITY – Nagapadulong na sa exit point sang Ukraine ang 38 ka mga Overseas Filipino Workers (OFWs) nga magapauli sa Pilipinas subong nga adlaw.
Ini ang ginkumpirmar ni Atty. Hans Leo Cacdac, Overseas Workers Welfare Administration (OWWA) administrator, sang mainterview sang Bombo Radyo.
Suno diri, ini ang dugang sa 18 ka mga yara na sa exit point nga magaabot man sa pungsod subong nga semana, apang ginklaro ni Cacdac nga pinaagi pa ini sang voluntary repatriation bangud wala paman sang mandatory repatriation nga ginmandu ang gobyerno sang Pilipinas.
Nahibaluan nga may yara sang 380 ka mga OFW’s nga yara sa Ukraine, apang 100 diri ang nagparehistro sa ila registration portal nga nagapangayo sang bulig agud makapauli.
Ginahibalo man sang ahensya kun ano ang rason sang iban nga wala makaparehistro, apang nagapati ini ang wala magparehistro ang posible yara sa hilway nga lugar, ukon nakapangasawa sang Ukranian kag ginpakamaayo nga magpabilin sa amu nga pungsod.
Matandaan nga sang tuig 2014, gin-ban na sang Pilipinas ang pag-hired sang mga OFW’s padulong sa Ukraine bangud man sa nauna nga kinagamo.
Ginsiling ni Cacdac nga ‘by land’ ang pamaagi sang transportasyon sang mga OFW’s, kun sa diin, ang luyag magpauli ang kinahanglan nga magpadulong sa Lviv, border sang Poland kag Ukraine, agud makasakay padulong sa airport sang Poland, kag didto na mahimo nga makasakay sang commercial flights padulong sa Pilipinas.
Ginpasiguro ni Cacdac nga libre ang pagpauli sang mga OFW’s kag may ginpreparar nga financial assistance kag school ukon livelihood assistance ang gobyerno para sa mga indi na magbalik nga OFW’s.
Magpakig-angut lamang sa embahada sang Poland agud makaparehistro sa Portal sang ahensya.
