Ginkumpirma sang Department of Health (DOH) nga wala sang nakita nga senyales sang hantavirus infection ang 38 ka mga Pinoy crew members nga sakay sang MV Hondius cruise ship nga magadungka subong malapit sa Cape Verde.
Suno kay DOH spokesperson Assistant Secretary Albert Domingo, napaidalum sa quarantine protocols ang mga Pinoy crew members samtang yara sa Cabo Verde.
Base sa data sang World Health Organization (WHO), may yara sang 147 ka tawo ang sakay sang barko kun sa diin tatlo diri ang napatay lakip ang mag-asawa nga Dutch nga kumpirmado nga natapikan sang hantavirus.
May kabug-usan nga pito ka kaso sang nasambit nga balatian ang na-record sa nasambit nga barko, samtang padayon naman ang monitoring sang mga health authorities sa iban pa nga mga pasahero kag crew.
Ang iban sa mga pasyente gindala na sa isa ka ospital sa South Africa, samtang ang iban naman ang natalana nga i-evacuate sa Netherlands para sa dugang nga pagbulong.
Suno sa DOH, magapabilin sa quarantine kag testing ang mga seafarers antes pahanugutan nga makapauli sa Pilipinas, sandig sa protocol sang mga pungsod nga ila pagakadtuan, kasubong sang Spain (Canary Islands).
