Ginbawian sang hulam nga kabuhi ang 39-anyos nga babayi matapos nga ini ang nalumos sa sapa sa Sitio Pulos, Barangay Najus-an, Mambusao, Capiz.
Ginkilala ang biktima nga si alyas “Lyn”, nga residente man sa nasambit nga lugar.
Sa nakuha nga impormasyon sang Bombo Radyo nagikan sa Mambusao MPs, samtang nagapaligo sa sapa ang nasambit nga biktima kaupod ang iya duha ka mga kabataan, natalupangdan nalang sini sang iya mga kabataan nga nabudlayan siya sa paglangoy kag gintinguhaan pa nga maluwas.
Dugang pa nga madasig nga nagpangayo sang bulig ang duha kun diin gin bululigan ini sang pila ka mga residente sa lugar nga makuha si Lyn sa sapa.
Gilayon naman ini nga gindala sa hospital apang gindeklarar ini nga dead on arrival sang doctor nga nag atinder.
Sa karon, yara na sa isa ka purenarya ang bangkay sang biktima.
