ROXAS CITY – Dakop ang 39-anyos nga lalaki sa ginkasa nga drug buybust operation sang Provincial Drug Enforcement Unit (PDEU) sang Capiz Police Provincial Office (CPPO) sa Barangay Inzo Arnaldo Village, Roxas City.
Ginkilala ang naaresto nga si Patricio Pelaez Jr. sang nasambit nga lugar.
Suno kay Police Lieutenant Mark Anthony Garcia, nga madugay nag nga ginamonitor ang drug suspek apang kahapon gid lamang natigayon nga madakpan pinaagi sa ila ginkasa nga operasyon.
Narekober sa posisyon sang drug suspek ang 16 ka sachets sang ginapatihan shabu, 20 mil pesos nga marked money apang 19,500 pesos nga fake money kag 500 pesos nga real money, kag mga drug paraphernalia.
Nahibaluan dugang nga naaresto na sadto ang suspek bangud man sa pagduso sang ilegal nga droga apang napahilway pinaagi sa plea bargaining agreement.
Sa baylo nga mag-untat, nagbalik sa iya ilegal nga aktibidad ang suspek.
Magapangatubang ang suspek sang panumbungon nga paglapas sa RA 9165 ukon Comprehensive Dangerous Drugs Act of 2002.
