ROXAS CITY – Arestado ang isa ka 39-anyos nga lalaki matapos nga ginaalegar nagatuga sang eskandalo kag ginpahog pa nga patyon ang kaugalingon nga amay sa Barangay Lawaan, Roxas City.
Ginkilala ang suspek nga si Ricky Dapogo sang San Enrique, Passi, Iloilo apang temporaryo nga nagapuyo sa Barangay Lawaan sining siyudad.
Base sa inisyal nga imbestigasyon sang Roxas City Police Station nga yara sa idalom sang impluwensya sang makahulubog nga ilimnon ang suspek kun sa diin ginaalegar nagatuga ini sang kinagamo sa ila lugar.
Magluwas diri, ginhanaan pa sang tubo sang suspek kag ginpahog nga patyon ang iya amay nga si Lorito Dapogo.
Bangud diri, ginpakamaayo na lamang sang iya amay nga ipaaresto sa mga pulis ang nasambit nga suspek para sa nagakaigo nga disposisyon.
