ROXAS CITY – Gintawag nga butigon sang 3ID Philippine Army ang tagpamaba sang New People’s Army (NPA) Central Panay matapos nga nagpahayag ini nga indi nila miyembro ang napatay sa Brgy. Dalagsaan, Libacao, Aklan sang Abril 1, 2022.
Sa interview sang Bombo Radyo kay Capt. Kim Apitong, tagpamaba sang 3ID Philippine Army, ginpahayag sini nga may yara sang natabo nga engkwentrohanay sa tunga sang militar kag NPA kun sa diin may napatay nga miyembro sang rebelde nga grupo kag narekober ang firearms nga gingamit sini.
Dugang pa ni Apitong, nga may yara sila sang ginahawiran nga ebedinsya nga nagapatuod nga isa ka miyembro sang NPA ang napatay kag indi sang sibilyan.
Matandaan, sa released statement ni Jurie Guerrero, tagpamaba sang NPA Central Panay, ginpahayag sini nga ang napatay isa ka sibilyan nga ginkilala kay certain Culao, residente sang Sibalom, Antique kag ginpanginwala man sini nga may miyembro sila nga napatay, bangud suno diri wala sang presensya sang NPA sa lugar sa amo nga tion.
Apang, ginsiling ni Apitong nga lunsay kabutigan lamang ang ginpahayag sang rebelde nga grupo. Sa karun, ang nasambit nga bangkay ang gin-turn over na sa Libacao-LGU kag ginahulat nalang nila nga may mag-claim samtang padayon pa ang paghibalo sa pagkakilalan sang napatay kag ginaproseso na ang mga kinahanglanon sini agud mahatagan sang nagakaigo nga paglubong. Nagapangabay man ini sa mga pumuluyo nga indi magpadala sa mga propaganda nga ginapahayag sang mga CPP-NPA terrorist bangud luyag lamang nila nga magpalapta sang sala nga impormasyon kag ginakumbensi man sini ang mga miyembro sang terorista nga grupo nga magsungka na samtang indi pa ulihi ang tanan.
