Ginakondenar sang 3rd Infantry Division sang Philippine Army ang pagpangbuno sa isa ka 19-anyos nga lalaki nga ginaalegar sang katapo sang Citizen Armed Force Geographical Units ukon CAFGU sa guwa sang baylehan sa Poblacion, Tapaz, Capiz.
Ang biktima amo si alyas “James,” 19-anyos kag residente sang Barangay Tabon, Tapaz matapos gin-alegar ginbuno sang suspek nga si alyas “Rex,” 20-anyos kag residente sang Barangay San Francisco, Tapaz.
Sa interview sang Bombo Radyo kay Major Jecey R Batiller, spokesperson sang 3rd Infantry Division, Philippine Army, iya ginpahayag nga may nagluntad ang komosyon sa tunga sang grupo sang biktima kag suspek sa guwa sang binayle kadungan sang pagsaulog sang kapistahan sang banwa, sang hinali nga ginbuno sang suspek ang biktima gamit ang kutsilyo nga nag-igo sa likod nga bahin sang iya tiyan.
Gilayon naman nga gindala sang Tapaz MDRRMO ang biktima sa Tapaz District Hospital agud madapatan sang nagakaigo nga pagbulong, apang ulihi na ini nga ginbawian sang kabuhi.
Samtang, yara na sa kustodiya sang kapulisan ang suspek samtang nagapadayon ang imbestigasyon angut sa insidente kag ang ginaalegar kahilabtanan sini sa CAFGU.
