Ginpasidunggan sang 3rd Infantry Division, Philippine Army sa pagpanguna ni LTGEN. Antonio G Naffarrete, Commanding General sang Philippine Army (CGPA) ang duha ka nasamaran nga soldado kadungan sang pagselebrar sang ika-52 founding Anniversary sang 3rd Infantry Division, Philippine Army sa Jamindan, Capiz.
Ang mga soldado amo sanday alyas ‘Moy’ nga halin sa 79th Infantry (Masaligan) Batallion nga nakabaton sang Military Merit Medal (with spearhead device) matapos ang engkwentro sang Abril 6, 2026 sa Brgy. Mina-utok, Calatrava, Negros Occidental.
Samtang si alyas “Rence” ang nakabaton man sang Military Merit Medal sa nagluntad nga engkwentro sang 79 Infantry Batallion batok sa miyembro sang Communist Terrorist Group “CTG”, sang Abril 19, 2026 sa Barangay Salamanca, Toboso, Negros Occidental.
Sa interview sang Bombo Radyo kay Captain Jessie Jun R. Ebalan, Chief Division Public Office sang 3rd Infantry Division, Philippine Army, iya ginpahayag nga nangin kabahin sang selebrasyon ang paghatag sang pagkilala sa mga soldado nga nagpakita sang kabakod kag dedikasyon sa ila serbisyo.
Suno kay Captain Ebalan, padayon nga ginpakita sang amo nga soldado ang ila kabakod kag dedikasyon sa pagserbisyo sa pungsod Pilipinas.
Dugang pa niya, ang paghatag sang sini nga mga medalya nagapakita sang pagkilala sang Philippine Army sa sakripisyo kag kabaganihan sang ila mga tropa sa pihak sang peligro nga ila ginapangatubang.
Sa subong, padayon ang Philippine Army sa pagpalig-on sang ila kampanya agud maproteheran ang mga pumuluyo kag mapabilin ang kalinong sa mga lugar nga ila ginabantayan.
