Nagdako ang trade deficit sang pungsod sadtong Agosto sa annual basis, suno sa Philippine Statistics Authority (PSA).
Samtanh sa month-on-month, ang trade deficit sa nasambit nga bulan nagnubo kung ikumparar sadtong Hulyo.
Ang total external trade in goods sang pungsod, nagabalor sang $17.87 billion sadtong Agosto subong nga tuig, nagtaas ini sang 1.8 percent nagikan sa $17.56 billion total external trade sadtong Agosto sang nakaligad nga tuig.
Suno sa PSA, sa kabug-usan, 62.2 percent ang imported goods, samtang ang nabilin nga 37.8 percent amu ang exported goods.
Ang export sales ang nagabalor sang $6.75 billion, samtang ang kabug-usan nga balor sang imported goods yara sa $11.12 billion buot silingon nga ang pungsod may yara sang deficit nga $4.38 billion.
Ang trade deficit sadtong Agosto, mas mataas sang 6.6 percent kung ikumparar sa $4.1 billion deficit nga naposte sa kaparehas nga panahon sadtong tinalikdan nga tuig.
Subong man ang trade gap sadtong Agosto kung sa diin mas manubo sa gihapon kung ikumparar sa $4.88 billion trade deficit sadtong Hulyo.
Ang pinakadako nga export sang pungsod amu ang electronics, masunod ang other manufactured goods, mineral products, machinery and others.
Mahibaluan nga ang dako nga bahin sang exported goods ang nakadto sa United States, nga siya ang pinakadako nga export market para sa Pilipinas.
Ang US ang nagabakal sang $1.22 billion nga Philippine-made goods sadtong Agosto nagsunod ang Hong Kong, Japan kag China.
Samtang, ang China naman ang pinakadako nga supplier sang pungsod sang imported goods nga nagabalor sang $2.79 billion ukon 25.1 percent sang total imports sang pungsod satong Agosto nagsunod ang Indonesia, South Korea, Japan kag US.
