ROXAS CITY – Ginabasol karon sang pamilya sang napatay nga pasyente sa Intensive Care Unit sa pamunuan sang Roxas Memorial Provincial Hospital ang kamatayon sang ila himata bangud sa wala gilayon mapaandar nga generator set.
Sa interview sang Bombo Radyo kay Manang Gina sang Roxas City, ginpahayag sini nga wala kuntani napatay ang iya bana kun gilayon kag tayuyon nga napaandar ang generator set sang ospital sadtong nakaligad nga Disyembre 25, 2019.
Mahibaluan nga nadulaan sang suplay sang kuryente sa probinsiya sa nasambit nga adlaw bangud sa pagpanalasa sang bagyo nga Ursula rason nga naggamit sang generator set ang ospital.
Apang suno kay Gina, indi sang tayuyon ang pagpaandar diri nga posible rason kun ngaman ginbawian sang kabuhi ang pila ka mga pasyente sa ICU.
Mahibaluan nga magluwas sa mister ni Gina napatay man ang tatlo pa ka pasyente gikan sa mga banwa sang Mambusao, Dumarao kag Panit-an.
Samtang nagpanindugan ang Hospital Management Section sang nasambit nga ospital nga wala sang dapat nga magapanabat sa natabo bangud indi man sang dululungan nga napatay ang mga pasyente kag may mga bulong ang mga ini nga kinahanglan pa nga ipaagi sa machines ukon apparatus.
Ginpasiguro naman sang Capiz provincial board nga ila imbestigahan ang nasambit nga hitabo.
