CAPIZ-Nagbaton sang bulig nga pesticides ang apat ka asosasyon sang mangunguma sang tubô sa Capiz agud mabuligan sila sa pag-atubang sang Red-striped Soft Scale Insects (RSSI) infestation nga nagahalit sa ila mga talamnan.
Ginpatigayon ang distribusyon sang pestisidio subong nga Oktubre 29, 2026, sa talatapan ni Gobernador Fredenil H. Castro, paagi sa pagbuligay sang Gobyerno Probinsyal sang Capiz kag Office of the Provincial Agriculturist (OPA).
Ang mga asosasyon nga nakabaton sang bulig amo ang Pilar Sugarcane Farmers Planters Association, Inc., nga may 1,090 ka benepisyaryo kag 5,508 ka pakete sang pestisidio; Lutod-Lutod Sugarcane Association, Inc., nga may 438 ka benepisyaryo kag 2,336 ka pakete; Capiz First Federation of United Coop., Inc., nga may 300 ka benepisyaryo kag 1,516 ka pakete; kag Capiz-Iloilo Sugarcane Planters Association, Inc., nga may 560 ka benepisyaryo kag 2,832 ka pakete.
Sa kabug-usan, 2,388 ka mangunguma ang makabenepisyo sa 12,192 ka pakete sang pesticides nga ginpanagtag agud mabuligan nga mapunggan ang paglapta sang peste kag maminusan ang kahalitan sa mga talamnan sang tubô.
Kabahin ini sang padayon nga sabat sang Gobyerno Probinsyal sa krisis nga gin-atubang sang industriya sang tubô sa Capiz. Sang Agosto 10, 2026, opisyal nga ginpaidalom ang probinsya sa State of Calamity bangud sa tuman nga kahalitan nga gindala sang RSSI sa mga talamnan kag pangabuhian sang mga mangunguma.
