ROXAS CITY – Indi mapunggan sang isa ka manunudlo nga magtulo ang iya luha sa tion nga handurawon sini ang iya mga naagyan nga kabudlay antes nangin pampubliko nga manunudlo.
Sa interview sang Bombo Radyo kay Sir Johnny Alcarde, 7 na katuig nga nagatudlo sa Carvasana National High School sa Calinog, Iloilo kag residente sang amu nga banwa, ginpakigbahin sini ang mga eksperyensiya sa iya kabuhi nga indi na sini luyag maeksperyensiyahan sang iya mga kabataan.
Pagsaysay sang manunudlo, nga sa iya lamharon nga edad, nagbulagay ang iya ginikanan.
Ini man ang rason nga nagdesisyon ini nga maglayas sa ila kag magsulod sa tawo agud maka-eskwela, kag sa edad nga 10-anyos, nakatapak ini sa Grade-1.
Tubtob nga nakatapos ini sa kolehiyo bilang Cum Laude, sa kurso nga edukasyon, pinaagi man sa iya pagtrabaho sa tawo.
Apang, ang iya paggradwar ang panugod lamang sa mga pagtilaw nga nagahulat sa iya kabuhi, bangud 7 ini ka beses nga nagtinguha tubtob makapasar sa Licensure Examination for Teachers (LET).
Tuig 2015, sang nakasulod ini sa public school, kag sang nagligad nga adlaw, nagtapos naman ini sa iya Master’s Degree major in Filipino.
Tuman ang pagpasalamat ni Alcarde sa mga tawo nga nagbulig sa iya agud maka-eskwela, gani ginbalik sini ang pagpasalamat pinaagi sa pagpa-eskwela man sang iya asawa.
Sa pihak sang mga nalampuwasan sini nga pagtilaw, makabig sang manunudlo nga pinakamasubo nga parte sang iya kabuhi ang paggradwar, ini bangud sa 4 sini ka beses nga paggradwar – Elementarya, Sekondarya, Kolehiyo Kag Masteral – wala sini maeksperyensiyahan nga may ginikanan nga kaupod sa pagmartsa sa entablado.
Sa karon, bisan ano sini kasako sa trabaho, ginatinguhaan gid sang manunudlo nga matambungan ang mga espesyal nga adlaw sang iya duha ka mga kabataan, bangud indi sini luyag nga maeksperyensiyahan sang iya kabataan ang iya naagyan.
Wala man ini nagdumot sa iya kaugalingon nga ginikanan, nga lunsay naman nagtaliwan.
