ROXAS CITY – Ginabulubanta nga mas o menus sa P300,000 ang nangin kahalitan sa nagluntad nga sunog sa Beehive Inn kag kaingud nga balay sa Plaridel St., Barangay 8, sining syudad.
Ginpahayag ni FO2 Philamer Distura sang Roxas City fire station nagaguwa sa inisyal nga imbestigasyon sang talatapan nga sa kisame nag-agi ang kalayo nga naglatay sa apat ka mga hulot sang lodging house totally burned kalakip sa ginarentahan nga balay ni Jude Guycoa sa diin naubos sunog ang mga appliances sini.
Ginasiling nga sa tunga nga kuwarto sang nasambit nga lodging house nagsugod ang kalayo.
Kapin sa siyam ka mga firetruck ang nagresponde sa sunog antes dalayon nga napalong ang kalayo.
Nauna diri ginpahayag ni Annabel Gregorio, caretaker sa nasambit nga lodging house nga nagakatulog ini sang nakabati sang pagkinagual sang mga tawo.
Sa pagguwa sa iya nga kuwarto, nakita sini ang kalayo sa apat ka mga hulot.
Nagpanawag sila sa Roxas City fire station nga gilayon man nagresponde sa lugar.
Nahibaluan nga ginapanag-iya ni Armando Fuentes ang nasambit nga lodging house.
Sa karon padayon ang imbestigasyon sang Roxas City fire station sa nagluntad nga sunog.
