ROXAS CITY – Dakop ang apat ka mga indibidwal kalakip ang isa ka anay barangay kagawad sa ginkasa nga search warrant sang mga miyembro sang Provincial Drug Enforcement Unit sang Capiz Police Provincial Office, Philippine Drug Enforcement Agency (PDEA), Pontevedra kag Pilar Municipal Police Station sa apat ka mga balay nga ginapahayag nagaserbe nga ‘drug den’ sa Barangay Tabuc, Pontevedra, Capiz.
Ginkilala ang mga naaresto nga sanday Ricardo Biclar, Jr., 39 anyos, anay barangay kagawad; Jeric Daliva; Remuel Mayo, 33 anyos; kag Joselito Espurtuno.
Sa ginkasa nga operasyon sang mga otoridad, narekober sa balay ni Biclar ang lima ka sachets sang ginapatihan shabu, mga empty sachets kag mga drug paraphernalia; duha ka sachets sang ginapatihan shabu kag mga drug paraphernalia naman ang nakuha sa balay ni Mayo; samtang pila man ka mga empty sachets sang ginapatihan shabu kag mga drug paraphernalia man ang nakuha sa balay nanday Daliva kag Esportuno.
Mahibaluan nga ang balay ni Biclar ang ginapahayag nagaserbe nga ‘bagsakan’ ukon pulunduhan sang ilegal nga droga kag ang tatlo ka iban pa ang nagaserbe sini nga runner.
Ang search warrant batuk sa mga suspek ang pirmado kag ginrekomendar ni Regional Trial Court (RTC) Executive Judge Ignacio Alajar.
Sa karon nakaaresto na sa Pontevedra Municipal Police Station ang mga suspek kag natalana nga pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002.
