ROXAS CITY – Nakaaresto sa karon ang apat ka mga indibiwal sa separado nga mga presuhan sa Capiz matapos nga gindakop sang mga kapulisan bangud sa paglapas sa ginapatuman nga curfew hours sa probinsiya.
Una diri, naaresto sa banwa sang President Roxas si Sonny Bacli, 38-anyos sang Barangay Bayuyan sang nasambit nga banwa.
Mahibaluan nga yara sa idalom sang impluwensiya sang makahulubog nga ilimnon ang nasambit nga persona.
Gindakop man sang mga pulis sa banwa sang Panitan ang isa ka 49-anyos nga si Arnel Duran matapos nga ginaalegar nagtuga sang kinagamo sa Barangay Tabuc Sur, Panitan, Capiz.
Ginapahayag nga nagreklamo sa Panitan PNP si Linda Duran 70-anyos matapos nga ginaalegar nga nagamaoy kag yara sa idalom sang impluwensya sang makahulubog nga ilimnon ang suspek kadungan sang selebrasyon sang iya nga kaadlawan.
Magluwas diri, arestado man ang isa ka 46-anyos nga persona nga si Jonel Santiago nga ginaalegar nagbato sa mga opisyales sang barangay matapos nga ginsaway ini nga nagalagaw sa oras sang curfew.
Samtang, ginpaaresto naman ni Punong Barangay Floyd De Jose sang Barangay Culajao sining siyudad si Mike Alcodia sang nasambit nga lugar matapos nga nagalagaw pa sa oras sang curfew.
Mahibaluan nga ginapatuman sa karon sa bilog nga probinsiya sang Capiz ang curfew hours humalin alas 8 sa gab-i tubtob alas 5 sa aga base sa Executive Order No. 11, series of 2020 nga ginpapanaog ni Capiz Governor Esteban Evan Contreras.
