ROXAS CITY -Ginpasakaan na sang panumbongon ang apat ka mga suspetsado nga ginatudlo imbolbado sa kamatayon sang retired member sang Philippine Army kag supervisor sang Golden Claw Security Agency nga ginhold-up kag gintiro patay sa Barangay Bolo, Roxas City.
Ginpasakaan na sang panumbongon nga Robbery with Homicide sa City Prosecutor’s Officer sa Roxas City Hall of Justice ang mga suspetsado nga sanday Rogelio Padernal, Garry Onilan, Ian Abagatnan kag Romulo Briyol nga ginatudlo responsable sa pagpatay sa biktima nga si Retired Master Sergeant Juniffer Borda.
Matandaan nga una nga nadakpan sang mga kapulisan si Rogelio Padernal nga gintudlo “master mind” sa paghold-up sa kay Borda.
Sa ginkasa nga hot pursuit operation nadakpan sa Sitio Bato-Bato Barangay Dulangan, Pilar, Capiz si Garry Onilan nga nag-ako nga amo ang triggerman ukon nagtiro sa biktima samtang nadakpan man sa Barangay Tacbuyan, Estancia, Iloilo si Ian Abagatnan nga ginatudlo nga driver sa ginsakyan sang mga suspetsado.
Samtang si Romulo Briyol naman ang ginatudlo nga nagpacontact kay Onilan agud himuon ang krimen.
Narekober sang mga kapulisan sa mga suspetsado ang isa ka unit sang motorsiklo, helmet nga nagaduag pula, jacket nga nagaduag itom, 12-gauge shotgun, kalibre .22 nga armas-luthang, kalibre .45 nga armas-luthang kag P25,000 nga cash.
Natalana naman nga ipaidalum sa paraffin test si Onilan kalakip na ang narekober nga kalibre .45 nga armas-luthang nga ipaidalum man sa ballistic examination.
Sa karun nakahunong na sa karsel ang tatlo ka mga suspetsado samtang nagapabilin nga at-large si Briyol.//
