Padayon ang ginapatigayon nga effort sang Indian Coast Guard agud makita ang apat ka iban pa nga mga tripulante nga nadula matapos natabo ang dako nga sunog sa isa ka Singapore-flagged cargo ship sa katunga-tungaan sang Arabian Sea malapit sa baybayon sang Kerala, India.
18 sa 22 ka miyembro sang mga tripulante ang naluwas na sang Indian Coast Guard. Nahibaluan nga ang nagkaladula nga apat ka mga crew ang nagikan sa Taiwan, Myanmar, kag Indonesia.
Nagpadala naman sang bulig ang Singapore Maritime and Port Authority (MPA) agud suportahan ang operasyon.
Madumduman nga nagikan pa sa Colombo, Sri Lanka ang barko nga padulong kuntani sa Mumbai, India, sang ginreport sang kapitan sang barko nga may nabatian sila nga makusog nga pagsabog sa isa ka container kun sa diin 50 ka mga containers halin sa barko ang nahulog sa dagat.
Samtang nag-isyu sang paandam ang Indian National Centre for Ocean Information Services (INCOIS) natuhoy sa posible nga oil spill kag mga debris gikan sa barko, nga mahimo magdala sang peligro sa dunang manggad.
