ROXAS CITY – Lunsay mga mag-utod kag estudyante sang Don Amando Bayot Sr. Integrated School sa Barangay Cagay, Roxas City ang 4 ka mga panibag-o nga kaso sang dengue sa ila lugar.
Sa interview sang Bombo Radyo sa Committee on Health and Sanitation sang barangay nga si Anthony Francis Medina, ginpahayag sini nga ginkakibot nila nga mga opisyal sang nahibaluan nga may yara naman sang nabalhag nga kaso sa amu nga sakit ang ila barangay.
Suno kay Medina, matapos mahibaluan ang report gilayon sila nga nagpangayo sang bulong agud magpatigayon sang misting.
Mahibaluan nga ginapatihan nagikan sa amu nga buluthuan nakuha sang mga estudyante ang sakit bangud sa mga matag-as nga kalikutan sa likod sini.
Dugang pa sang opisyal nga gilayon man sila nakig-angut sa talatapan sang gobyerno probinsyal agud hinyuon nga magpatigayon sang fogging sa eskwelahan apang wala ini natigayon bangud may mga aktibidad.
Bangud sini, agud malikawan nga madugangan pa amu nga kaso sa bulig sang mga 4Ps beneficiary nagapatigayon sila sang Clean Up Drive kada semana sa eskwelahan subong man sa palibot.
Sa karun, ginsiling ni Medina sa iya pagbulubanta yara na sa kapin 40 nga mga kaso ang nabalhag sa ila barangay.
Panugyan sini sa iya kasilingan nga kung mahimo magkooperar sa ila pinaagi sa pagpangtinlo sang palibot kag hibaluon ang gina-istaran kag ginatiniran sang lamok nga may dala nga sakit nga dengue.
