ROXAS CITY – Arestado ang apat ka mga indibiwal sa siyudad sang Roxas matapos nga gindakop sang mga kapulisan bangud sa paglapas sa ginapatuman nga curfew hours sa probinsiya.
Una diri, naaresto sa Barangay Adlawan sining siyudad ang tatlo ka mga persona nga sanday Novem Placido 22-anyos, Art Dordas 19-anyos kag isa ka wala na ginhingadlan nga menor de edad nga lunsay mga residente sang Barangay Carataya, Maayon, Capiz.
Ini matapos nga tuyo kuntani nga magsulod sa boarder sang siyudad ang tatlo ka nasambit nga mga persona rason nga ginpakamaayo na lamang ang mga ini nga dal-on sang mga opisyales sang barangay sa pulisya.
Magluwas diri, nadakpan naman sa Barangay Lawaan sining siyudad ang 29-anyos nga si Jonvy Tejada kun sa diin ginaalegar nga may yara pa ini sang duha ka mga kaupdanan apang nakapalagyo.
Ginapahayag nga yara sa idalom sang impluwensya sang makahulubog nga ilimnon ang nasambit nga mga persona.
Mahibaluan nga ginapatuman sa karon sa bilog nga probinsiya sang Capiz ang curfew hours humalin alas 8 sa gab-i tubtob alas 5 sa aga base sa Executive Order No. 11, series of 2020 nga ginpapanaog ni Capiz Governor Esteban Evan Contreras.
