ROXAS CITY – Dakup ang apat tanan ka mga persona matapos akto nga nadakpan nga nagapatigayon sang iligal nga pagpangisda sa kadagatan nga sakup sang Panay, Capiz.
Sa separado nga operasyon sang bantay dagat, natigayon nga madakpan sanday Albert Bildia, 47-anyos, boat captain, kag crew nga si Bongbong Tenorio, 47-anyos, lunsay mga residente sang Brgy. Casanayan, Pilar, Capiz.
Nadakpan man sanday Rommel Burgos, 28-anyos, boat captain, kag ang crew sini nga si Bernard Apayong, 19-anyos nga lunsay mga residente sang nasambit nga lugar.
Nakuha sa paghinakop sang duha ka grupo sang mangingisda ang tig-1 ka unit sang baruto, makina, lambat kag tig-5 ka kilos nga nanari-sari nga isda.
Ginlapas sang mga ini ang Municipal ordinance No. 03-02 series of 2003 pinaagi sa paggamit sang ‘Trawl’ isa ka sahi sang iligal nga pagpangisda.
Ginkustodiya ang mga nakumpiskar sa MENRO-Panay para sa nagakaigo nga disposisyon.
