ROXAS CITY- Natalana na nga pasakaan sang kaso ang apat ka mga imbolbado sa pagbitay kag pagpatay sa ido sa Barangay Blasco, banwa sang Pilar sang damlag lang.
Matandaan nga ang amo nga mga imbolbado ang isa ka barangay tanod sa nasambit nga Barangay, nagapanag-iya sang ido, ang nagkuha sang video kag ang SK Chairman sa amo nga lugar.
Sa interview sang Bombo Radyo kay Atty. Ann Margaret Dy, President sang CAWAI, ginpahayag nga nakapreparar na ang mga requirements sa pagfile sang kaso batuk sa mga imbolbado sa masunod nga semana.
Base sa ila ginpatigayon nga imbestigasyon, nagaguha nga wala nagasugid sang matuod ang mga ini bangud suno sa pahayag sang mga akusado nagbuang ang amo nga ido rason nga ila ini ginpatay agud indi na maghalit sa ila palibot.
Apang indi naman santo sa nangin imbestigasyon sang mga katapo sang kapulisan kag amo man sang Animal welfare.
Samtang, wala naman ini may gin-presentar nga bangkay sang ido kun matuod nga nagbuang lamang ang ido kag ila ini ginlubong.
Suno pa kay Dy wala na mahimo pa ang ila talatapan apisar nga naga-pakitlooy ang mga ini sa pagpangayo sang pasaylo bangud kinahanglan sini sundon ang nasambit nga layi kag nagakadapat nga atubangon sang mga ini ang ila nakumiter nga krimen. //
