Ginbawian sang kabuhi ang apat ka tuig nga bata nga lalaki sa General Santos City isa ka bulan matapos ini nga makagat sang layaw nga ido nga ginapatihan nga may rabies.
Nagalibog ang ulo sang ginikanan sang bata kun ngaa napatay ang ila anak bangud suno sa ila, nahatagan man ini sang bakuna kontra rabies.
Hulyo 9 sang ginkagat sang ido ang bata sa Barangay Sinawal.
Kaupod sang bata ang iya iloy sang nagbakal sang pagkaon sang matabo ang insidente.
May yara sang pilas ang bata sa nawong kag dulonggan tuga sang kagat sang ido.
Gindala man siya sa ospital sa diin ginlimpyohan kag gintahi ang iya pilas kag ginhatagan sang bakuna batuk sa tetanus.
Isa ka adlaw matapos ginhatag ang tetanus shot, ginhatag naman sa bata ang una nga dose sang bakuna batuk sa rabies.
Apang matapos nga mahatag ang ika-tatlo nga dose sang anti-rabies shot, nakitaan sang sintomas sang epekto sang rabies ang bata.
Pahayag sang iloy, Hulyo 17 sang ulihe nga bakuna sang anti-rabies sa iya anak.
Nagdumdom ang iloy nga wala sang may nabatyagan ang iya anak apang sang Agosto 6, nagreklamo ang bata nga nagasinakit ang iya tyan.
Matapos paimnon sang bulong, nadula man temporary ang pagsakit apang pila ka oras ang nagligad, nag-umpisa na nga makulbaan sa tubig ang bata.
Gindala sa ospital ang bata kag nakabatyag man ini sang kulba sa hangin.
Pagkasunod nga adlaw, nagtaliwan ang bata kag gilayon nga ginlubong.
Paathag naman sang ospital, apat nga dose sang bakuna ang masami nga ginahatag sa nakagat sang ido apang wala na nakalab-ot pa sa ulihe nga dose ang pasyente.
Gin-categorize sa Category 3 ang pilas sang bata bangud malapit ini sa ulo.
