4 ka tuig nga bata pilason matapos mabungguan sang salakyan sang isa ka pulis

ROXAS CITY – Pilason ang apat ka tuig nga bata nga babaye matapos mabungguan sang salakyan nga ginamaneho sang isa ka pulis sa Barangay Cogon, Panit-an, Capiz.

Gilayon nga gindala sa ospital ang biktima matapos nakaangkon sang magkatuhay nga kasamaran sa lawas.

Base sa inisyal nga imbestigasyon sang pulisya, samtang ginamaneho ni Police Officer 3 Abbie Bermejo ang iya salakyan sa nasambit nga lugar, hinali na lamang nagdalagan patabok ang biktima.

Wala ini matalupangdan ni Bermejo rason nga aksidente niya ini nga nabungguan.

Sa karon padayon nga ginabulong sa ospital ang biktima kag ginpasiguro naman ni Bermejo nga iya pagaabagahon ang kagastuhanan sa pagpabulong sa nasambit nga bata.