ROXAS CITY – Nagpanindugan si anay Bayan Muna Representative Neri Colmenares nga kwestyunable ang pagbuhi sa kaso nga murder kag pagpaguwa sang warrant of arrest batuk sa apat ka mga anay mamalidha nga sanday National Anti-Poverty Commission (NAPC) Chairperson Liza Maza, anay DAR Secretary Rafael Mariano, anay Representative Teodoro Casiño kag Satur Ocampo.
Sa interview sang Bombo Radyo Roxas kay Atty. Neri Colmenares, ginpahayag sini nga nakibot sila nga liwat ginbuhi ang murder complaint nga ginpasaka sa apat sang panahon nga presidente pa sang Pilipinas ang karon House Speaker nga si Gloria Macapagal Arroyo bangud sadto nag-desisyon ang RTC nga wala sang probable cause nga magapatood nga may kahilabtanan ang mga anay kongresista sa krimen.
Apang bangud may culture of impunity sa Pilipinas, ginagamit ang korte para i-harass ang opposition.
Indi man halos makapati Colmenares bangud kun sin-o pa ang madamo sang kaso kasubong sang korupsyon amo pa ang yara sa pwesto kasubong ni anay Presidente Gloria Macapagal Arroyo nga karon House speaker na sang House of Representatives.
Ginpasiguro sang anay kongresista nga wala nagapanago ang mga anay mamalidha kag ila atubangon ang kaso.
