ROXAS CITY – Ginkumpirma ni Police Regional Office 6 Spokesperson Police Supt. Joem Malong nga ginpatawag sang bag-o nga director nga si Chief Superintendent John Bulalacao, ang apat ka pulis nga nakuhaan sang litrato nga yara sa sulod sang bulangan.
Ginkilala ang nasambit nga mga pulis nga sanday SPO1 Jose Roy Sandoval sang Negros Occidental Police Provincial Office; PO3 Nilo Gallaron nga na-assign sa Regional Headquarters Support Group; PO1 Ryan Villareal nga na-assign sa Sapian MPS sa Sapian, Capiz; kag PO1 Wilmat Sumpio nga assign sa Iloilo City Police Station 3.
Sa interview sang Bombo Radyo Roxas kay Supt. Malong, ginpahayag sini nga sa pag-atubang sang apat ka pulis kay Director Bulalacao, ila gin-ako nga sila ang yara sa laragway nga nakuha sa sulod sang bulangan.
Sa pihak sang pagpangayo sang patawad sang apat sa ila nga ginahimo, nagpanindugan si Bulalacao nga indi niya pag-itolerate kag patawaron ang mga ini.
Nahibaluan nga sa pihak nga naka-civilian clothes ang apat sa mga litrato, nakilala sa gihapon sila nga mga pulis sa diin hugot nga ginadumilian ang mga pulis nga magsulod sa bulangan kag iban pa nga gambling den.
