ROXAS CITY – Patay ang apat ka mga indibidwal samtang pilason naman duha pa ka mga persona kag padayon sa karon nga ginabulong sa ospital matapos nagbunggo ang isa ka salakyan sa tatlo ka puno sang niyog sa People’s Park, Barangay Baybay, Roxas City.
Sa inisyal nga impormasyon, dead-on-arrival sa ospital sanday Bryan Macalintal residente sang Barangay Culasi, Patrick James Llave kag Jomer Baes, lunsay mga residente sang Barangay Tanque, John Bert Chinggo, residente sang Fuentes Subdivision, sining siyudad samtang pilason kag padayon naman nga ginabulong sa ospital ang driver sang Mirage Mitsubishi nga salakyan nga isa ka Indian National nga si Happy Singh kag Joy Gilo Felarca, lunsay mga residente sang Barangay Dolores, Dumalag, Capiz.
Suno sa iya sa mga nakasaksi sa aksidente, tuman kadasig ang pagpadalagan sa nasambit nga salakyan rason nga nagbunggo ini sa tatlo ka puno sang niyog.
Ginpahayag pa sini nga, tumampilak sa dalan ang apat ka mga napatay kag nag-angkon sang patal nga pilas nga gintunaan sang ila nga kamatayon.
Mahibaluan nga naga-roadtrip kag naga-kinasadya ang mga biktima sang natabo ang aksidente.
Nahibaluan pa nga naggikan ang mga ini sa isa ka balay-ilimnan sa siyudad kag ginapatihan nga yara sa impluwensiya sang makahulubog nga ilimnon ang driver nga Indian national.
Sa karon padayon pa ang imbestigasyon sang traffic section sang Roxas City Police Station sa nasambit nga aksidente.
