DUMALAG, CAPIZ – Natigayon nga mabalik sa tag-iya ang nadula sini nga karabaw sa Barangay Sto. Angel, Dumalag, Capiz.
Ini matapos nga nadakpan mismo sang isa ka punong barangay ang apat ka mga suspek nga ginaguyod ang amo nga karabaw.
Mahibaluan nga naaresto sang mga kapulisan ang ginatudlo suspek nga sanday Dave Ospan, 20 anyos; Melvin Agisanda, 19 anyos, lunsay residente sang banwa sang Dumarao; Juanito Sevilla, 19 anyos sang banwa sang Dao kag isa ka menor de edad.
Una diri, nagpabalhag sa pulisya ang tag-iya nga si Antonio Paderes, 59 anyos nga nadula ang iya nga karabaw.
Apang nagpalab-ot sang impormasyon ang isa ka punong barangay sa mga otoridad nga nakit-an sini ang apat ka mga suspek nga may ginaguyod nga karabaw.
Bangud diri, ginpadulungan ang mga suspek kag didto nakompirmar ni Paderes nga iya nga karabaw ang ginaguyod sang mga ini.
Natalana naman nga pasakaan sang nagakaigo nga panumbungon ang nasambit nga mga kawatan.
