ROXAS CITY – Pilason ang apat ka mga indibidwal matapos nagbunggo ang ginasakyan sang mga ini nga tricycle sa isa ka pribado nga salakyan sa Barangay Sibaguan, Roxas City.
Ginkilala ang mga napilasan nga sanday Roberto Honrado, 60 anyos, driver sang tricycle, kag mga pasahero sini nga sanday Evir Cerilo, 53 anyos; Raffy Cerilo, 34 anyos; kag Emily Arangonte, 33 anyos, lunsay mga residente sang Barangay Dapdapan, Sapian, Capiz.
Sa interview sang Bombo Radyo Roxas sa driver sang pribado nga salakyan nga si Lody Angari, 63 anyos sang Barangay Amaga, Sigma, Capiz, samtang ginasubay sini ang amo nga lugar, iya na lamang ginkakibot ang pagbunggo sang amo nga tricycle nga nagasunod sa iya salakyan.
Apang suno naman sa mga sakay sang tricycle, samtang ginasubay ang amo nga lugar, hinali na lamang nga nag-preno ang salakyan nga ginamaneho ni Angari rason nga ila ini nabungguan.
Bangud sa pagkabunggo sang tricycle sa salakyan, nag-angkon sang mga pilas sa lawas ang mga sakay sang tricycle nga gilayon man gindapatan sang nagakaigo nga pagbulong.
