ROXAS CITY – Pilason nga ginpadangat sa ospital ang apat ka persona kalakip ang menor de edad matapos aksidente nga nabungguan sang isa ka salakyan ang ila tricycle sa Arnaldo Boulevard, Barangay Baybay, Roxas City.
Kalakip sa mga napilasan amo ang driver sang tricycle nga si Ryan Esmolayan sang Barangay Tico, Panay kag ang mga pasahero nga sanday Grace Borlio 31-anyos, Rose Ann tatlo ka tuig ang edad sang Sitio Altavas, Arnaldo Boulevard, Barangay Baybay kag Aryan Borlio 17-anyos sang Barangay Tabuc, Pontevedra, Capiz.
Samtang ginasubay sang tricycle ang dalan, aksidente nga nabungguan sang Toyota Cruiser wagon nga ginamaneho ni Ambrocio Borda sang Barangay Lawaan, Roxas City ang nalikod nga bahin sang tricycle.
Bangud sa impact nag-apok ang mga biktima sa karsada.
Gilayon sila nga gindala sa ospital agud madapatan sang nagakaigo nga pagbulong ang pilas nga ila naangkon.
