ROXAS CITY – Pilason ang apat ka mga persona matapos ang nagluntad nga aksidente sa Barangay Poblacion Tabuc, Maayon, Capiz.
Ginkilala ang mga napilasan nga sanday Alexander Estotia, 37 anyos, driver sang Suzuki Smash nga motorsiklo sang Barangay Tapulang; Wilkie Desalet, 50 anyos, driver sang Yamaha Mio sang Poblacion Tabuc sang nasambit nga banwa kag Marcelino Palonpon kaupod ang asawa sini nga si Anabelle Palonpon nga sakay sang isa ka tricycle.
Sandig sa inisyal nga imbestigasyon sang mga kapulisan sang Maayon Municipal Police Station, samtang ginasubay ni Desalet ang dalan sang aksidente na lamang ini nasanggit ang motorsiklo ni Estotia sa pihak nga linya sang kalsada kabangdanan nga natumba ini.
Kadungan sini, aksidente man sini nga nasanggit ang tricycle ni Palonpon nga nagresulta sang pag-angkon sang kasamaran sang apat ka mga nasambit nga persona.
Gilayon nga gindala sa Rural Health Unit ang tatlo samtang ginpadangat naman sa ospital si Desalet bangud sa madalum nga kapilasan nga naangkon sini.
Nagapabilin sa karon sa kustodiya sang mga kapulisan ang mga motorsiklo sang duha ka mga drivers.
