ROXAS CITY – Arestado ang 40-anyos nga lalaki matapos nga nabaklan sang indi lisensyado nga armas-luthang sa ginkasa nga buybust operation sang mga kapulisan sa Barangay San Nicolas, Pilar, Capiz.
Ginkilala ang arestado nga si Alyas “Rey” kag residente sang nasambit nga lugar.
Sa impormasyon nga nakuha sang Bombo Radyo Roxas nagikan sa Pilar Municipal Police Station, natigayon nga madakpan ang nasambit nga suspek matapos mabaklan sang isa (1) ka unit sang homemade pistolized breaktype 5.56mm nga loaded sang tatlo ka bala kabaylo sang P1,000 nga buybust money.
Magluwas sa armas-luthang, narekober man sang kapulisan sa suspek ang isa (1) ka sachet sang ginapatihan iligal nga droga nga nabutang sa empty box sang condom kag ginabulubanta may kabug-aton nga lima (5) ka gramos kag may standard drug price nga P34,000.
Magapangatubang ang arestado sa kaso nga paglapas sa Republic Act 10591 ukon Comprehensive Firearms and Ammunition Regulations Act kag Republic Act 9165 ukon Comprehensive Dangerous Drugs Act of 2002. Sa karon, yara na sa kustodiya sang Pilar PNP ang nasambit nga arestado para sa nagakaigo nga disposisyon.
