ROXAS CITY – Gina-ayam sang mga pulis ang isa ka fish vendor nga nagbuno-patay sa isa ka lalaki kagab-I sa Washington St., Barangay 7, sining syudad.
Ginkilala ang biktima nga si Mario Concepcion 40-anyos sang New Road, Barangay Banica, sining syudad nga nag-angkon sang samad sa dughan.
Nagaguha sa imbestigasyon sang mga pulis nga dyutayan lamang magbungguanay ang tricycle sang biktima kag suspek nga si alyas Dakdak residente sang Barangay Milibili, sining syudad.
Posible nga ginkaakig ini sang biktima kag ginaalegar nga ginsumbag sini ang suspek.
Apang lipod sa ihibalo ni Concepcion nga ginbantayan ini ni alyas Dakdak kag sang makita hinali nga ginbuno sa dughan.
Gilayon naman nga nagpalagyo ang suspek kag ginbayaan ang tricycle nga may karga nga isda.
Gindala pa sa ospital ang biktima, apang ginbawian ini sang kabuhi samtang ginabulong sa ospital.
