ROXAS CITY – Daku nga palamangkutanon kun sin-o ang dapat basulon sa pagkadula sang 40 ka sako nga bugas nga bulig sang city government sa mga pumuluyo sang Barangay Olutayan.
Ginpahayag sang isa ka opisyal sang Barangay Olutayan nga nadiskubrehan lamang nga kulang na ang bugas sang ginadiskarga na ini sa barangay hall.
Indi man magpati ang nasambit nga opisyal nga mabilin sa pump boat nga ginkargahan ang nadula nga bugas, bangud wala na sang unod ang sakayan sang ila ini gintsekyar.
Ginapatihan nga posible sa trak pa lamang nga ginkargahan padulong sa Banica wharf nadula na ini, bangud suno sa isa ka tripulante nga nakita pa sini nga may nabilin nga bugas sa trak sa diin wala nagpondo sa pihak nga ila ini gintawag.
Samtang gilayon naman nga nagpakig-angut si anay Barangay Kapitan Manuel Bong Bong Aninang kay Mayor Ronnie Dadivas nga nagpromesa nga iya padalhan sang 40 ka sako kabaylo sang nadula nga bugas.
Nahibaluan nga kapin sa 283 ka sako nga bugas ang gin-alokar sang gobyerno sang syudad sa Barangay Olutayan bilang bulig sa mga pumuluyo.
