Nagalab-ot na sa 40,000 ka sako sang 50-kilogram nga bugas ukon kapin duha ka milyon ka kilo ang napanghatag sa Capiz humalin Enero 1 tubtob Hunyo 10, 2026 sa idalom sang P20 kada kilo nga bugas nga programa sang gobyerno.
Sa interview sang Bombo Radyo kay Jeomar Fajartin, Branch Manager sang NFA Capiz, iya ginpahayag nga ang programa ang bukas para sa mga mangunguma, drayber, minimum wage earners, mga benepisyaryo sang 4Ps, solo parents, persons with disabilities ukon PWDs, kag senior citizens.
Suno kay Fajartin, apat ka redemption sites ang yara karon sa mga bodega sang NFA sa Bolo, Roxas City, Sigma, Dumalag kag Aklan. Ang NFA Provincial Offices sang Capiz kag Aklan ang gintingob sang 2021 kag subong yara sa idalom sang NFA Capiz Branch.
Pahayag pa niya, ang kada kwalipikado nga benepisyaryo ang mahimo makabakál sang tubtob 30 kilo sang bugas kada bulan.
Samtang ang mga mangunguma naman ang mahimo makabakál sang tubtob 10 kilo kada bulan ukon 50 kilo bilang lima ka bulan nga alokasyon sa isa ka transaksyon.
Nahibaluan nga una nga ginlunsar ang P20/kilo nga bugas nga programa sa Capiz sang Hunyo 30, 2025, kun sa diin mga construction workers ang nangin una nga benepisyaryo antes ginpalapad ang programa agud malakip ang magagmay nga mga mangunguma, mangingisda kag iban pa nga sektor nga nakarehistro sa Registry System for Basic Sectors in Agriculture ukon RSBSA.
