Kapin 4,055 ka mangunguma kag farmworkers sa Capiz nga naapektuhan sang Red-Striped Soft Scale Insect (RSSI) infestation ang makabaton sang Emergency Cash Transfer (ECT) nga nagabalor sang ₱10,325 kada isa.
Ang duha ka adlaw nga paghatag sang ayuda nag-umpisa subong nga adlaw sa Pilar Civic Center sa banwa sang Pilar.
Personal nga nagkadto si Secretary Rex Gatchalian sa lugar sang payout agud mangin saksi kag magmonitor sang pagpanagtag sang ayuda. Kaupod man niya si Regional Director Joselito G. Estember para sa iban pa nga lokal nga concern.
Lakip sa mga kwalipikado nga makabaton sang ayuda ang mga mangunguma, tag-iya sang uma, kag mga agricultural worker nga naapektuhan sang RSSI infestation.
Kabahin ini sang nagakaigo nga sabat sang national government agud mabuligan ang mga apektado nga pamilya kag maminusan ang epekto sa ila pangabuhian bangud sang paglapta sang peste.
Padayon man ang DSWD sa pagpatuman sang payout operations sa iban pa nga mga apektado nga lugar sa rehiyon agud masiguro nga maabot ang pinansyal nga ayuda sa tanan nga kwalipikado nga benepisyaryo.
