PILAR, CAPIZ – Pilason ang isa ka lalaki matapos nga ginbuno sang iya kaupod sa ilimnan sa Barangay San Silvestre, Pilar, Capiz.
Ginkilala ang biktima nga si alyas Jovie 41-anyos samtang ang suspek amu si alyas Fredo, 57-anyos nga lunsay mga residente sang nasambit nga lugar.
Sa impormasyon nga nakuha sang Bombo Radyo sa Pilar Municipal Police Station, ginpahayag nga magkaupod ang duha nga nagainom-inom tubtob may natabo nga pagbinaisay nahanungod sa duta sa tunga sang suspek kag biktima.
Hinali nga nagkuha sang kutsilyo ang suspek kag ginbuno sa dughan ang biktima.
Gilayon nga gindala sa ospital ang biktima, samtang madasig naman nga nagpalagyo ang suspek sa wala mahibaluan nga direksyon.
Sa karon, nagapadayon ang imbestigasyon sang Pilar PNP angut sa nasambit nga insidente.
