ROXAS CITY – Nagdangop sang ila reklamo sa Bombo Radyo ang pamilya sang isa ka 42-anyos nga napatay nga mister nga residente sang Sitio San Isidro, Barangay Cagay sining siyudad matapos nga ginbalibaran sang lima ka mga ospital sa probinsya sang Capiz.
Suno sa magulang sang biktima nga may yara sang okasyon ang pamilya kun sa diin ginsurpresa pa nila ang kaadlawan sang ila iloy sang oras nga gin-atake ini sang iya balatian nga Cerebrovascular Disease.
Ginpahayag pa sini nga ginkarga iya manghod sa patrol car sang Barangay Cagay matapos nga gintawgan man nila ang Capiz Emergency Response Team ukon CERT apang wala man sang bakante nga van.
Bangud diri, una nga gindala ang pasyente sa Capiz Emmanuel Hospital apang ginbalibaran man sila bangud punuan na ang nasambit nga pasilidad.
Masunod naman nila nga ginkadtuan ang Capiz Doctor’s Hospital apang ginbalibaran man sila bangud wala naman sang bakante.
Ikatatlo nila nga ginkadtuan nga ospital ang The Health Centrum Hospital apang liwat sila nga ginbalibaran.
Ikaapat naman nila nga ginpadulongan nga ospital amo ang St. Anthony College Hospital kun sa diin ginkuhaan lang nila sang blood pressure ang pasyente kag ginkuhaan sang apparatus agud malantaw ang kondisyon sini apang gin-refer man sila sa iban nga ospital matapos nga wala na sang bakante nga Intensive Care Unit (ICU).
Ikalima naman nila nga ginpadulongan nga ospital amo ang Roxas Memorial Provincial Hospital ukon RMPH apang ginbalibaran man sila bangud wala man sang bakante.
Mahibaluan nga halos naga-tagumatayon na ang pasyente apang ginaalegar nga ginpabay-an lamang sila sang lima ka ospital nga ila ginpadulongan kun sa diin nadesisyunan na lamang nila nga dal-on ini sa Bailan District Hospital.
Base naman sa medical certificate sang pasyente nga dead on arrival na ini sang gindala sa Bailan District Hospital.
Dismayado kag indi mabaton sang pamilya sang napatay nga pasyente ang natabo sa ila himata.
Ginpahayag pa sang pamilya nga sang nakaabot na sila sa Bailan District Hospital daw kasubong nga gin-diskriminar pa sila sang natukiban nga residente sila sang Barangay Cagay sining siyudad kun sa diin nakapagkit na sang kaso sang COVID-19.
Samtang, indi naman mabaton sang pamilya ang natabo sa ila himata kag luyag nila kuntani nga mahatagan sang hustisya ang natabo sa ila.
Mahibaluan nga base sa pamilya nga isa ini ka tricycle driver ang napatay nga pasyente kun sa diin wala man ini ginkuhaan sang swab test nga pamatuod nga matawag ini nga COVID-19 suspect apisar nga wala pa ang resulta sang iya nga test.
Gilayon naman nga ginlubong ang nasambitan nga pasyente.
