ROXAS CITY – Patay ang 42-anyos nga mister matapos makuryente sa Sitio Camansi, Brgy. Lonoy banwa sang Sapian.
Ginkilala ang biktima kay Juvie Orale, isa ka fishpond caretaker kag residente sang nasambit nga lugar.
Sandig sa imbestigasyon sang Sapian Municipal Police Station, takna alas 8:30 kagab-i natabo ang insidente, kun sa diin nagtakod sang bombilya ang biktima malapit sa ila balay agud pasigahon ang ila palibot, apang ginapahayag nga nalipatan sini nga i-switch off ang ila main switch kag nagpadayon ini sa pag-ubra.
Ginkakibot nalang sang misis sang biktima nga si Merlina Orale, 33-anyos nga may lumagapok kag sa iya pagtsekyar nakit-an nalang sini nga nahulog na sa fishpond ang iya bana kag ginakuryente.
Madasig naman sini nga ginsinggitan ang iya 14-anyos nga anak nga tuyo kuntani magbulig sa amay kag ginhambalan nga indi pagtandugon ang biktima kag gilayon sini nga gin-switch off ang ila main switch.
Mahibaluan nga nagapuyo malapit sa fishpond ang magpamilya.
Ginbululigan sang mag-iloy nga makuha sa tubig ang biktima kag nakit-an diri nga hawid pa sini ang wire kag bombilya kag may paso na ini sa dughan.
Gilayon naman sila nga nagpangayo sang bulig sa ila mga kalapit kag ginapahayag nga nagaginhawa pa ang biktima sang ginpadangat sa Mambusao District Hospital, apang gindeklara sang doktor nga dead on arrival.
Sa karun, yara na ang bangkay sang biktima sa isa ka punerarya sa banwa sang Sapian.
